日記 | 20/06/2004 北京遊第一天

今日晨咁早就起身啦，今日要９點鐘去都機場。但係最衰就係呀媽發現左架Ｅ１１，比機場巴士平一半，所以咁次我又無得坐Ｃｉｔｙｆｌｙｅｒ啦。係巴士站，見到我屋企樓下既女人同佢個女，知道佢又係去北京。唉，又要聽佢講ｈｋｕ乜乜好，佢個女點咁勁啦～～～去到機場，見到ｄ團友，不禁嘆息一句，”豬扒團”。點解無乜靚女去北京架！我搭既係中國南方航空公司既ＣＺ３０９，由香港直飛到北京。經過上一次華東領教過東航既威力，我都唔抱太大既期望。但係今次真係好搞笑，我地行到去登機閘口啦，咁Ｗｉｎｎｉｅ同我講：”架飛機未到呀！坐下先啦。”但係當時已經夠鐘登機架啦，咁我就望真ｄ啦，只係見到架機腳，原來架機已經到左，但係俾條駁橋完全遮住。死啦，條橋仲大架隻飛機～～～


咁上到機啦，我地坐最後果排，ｄ位勁窄兼且無得向後臥，ｄ野有勁難食，唯一安慰既係個空姐幾靚，我真係有ｄ衝動想上去同佢影張合照。

去到北京，我以江澤民式落機，超搞笑～～～行到落停機坪，架車又未到，所有人都企晒係到曬太陽～～～跟住巴士到，成機既人上晒架巴士，可想而知架機有幾大呢，巴士差唔多行勻成個機場，好正！我終於可以好近距離咁睇ｄ飛機。架車行左１０分鐘先至到客運大樓，入境完一出閘就見到又勁多人到接機，因為同時間又有ｈｋｕ既交流團到。


北京遊第一站係去三屯里，隔離既三屯里雅秀服裝市場，成過場都係賣衫為主，不過係呢到買野就一定要講價，如果唔係就俾人殺到一頸血。呢都係第一站，其實都係俾大家實習下點去講價，因為成個北京買野都係要講價。我買左件Ｔｅｅ，佢開價Ｙ１９０，跟住佢就會話平Ｄ俾你，跟住我就開始走人，佢就會係咁降價，當你行到轉角位消失於佢視線範圍之際，佢就會講出佢既底價。結果呢，Ｙ４０成交。
買左Ｄ野跟住就去下一站，就去地壇公園裡面既冰雕展覽館，無乜特別，比較好玩既係我玩左好多次既冰滑梯。玩完之後就去食飯，第一餐，見到同台既團友，無乜野講。Ｄ野都係麻麻地好食，算啦只係＄１５９９既團費，都話明無乜好野食架啦。食完飯就返酒店，今晚係住春暉園渡假村，好靚好大，淨係間房都有２房４床１廳１廁所。夜晚就去浸溫泉同做ＳＰＡ，由於呀媽無帶泳衣，所以只能夠係旁邊睇。咁第一日咁就玩完。