日記 | 30/06/2004 石澳ＢＢＱ

今日約左班大同（包括我啦，Vincent, Mike, Annie, Bonnie, LeeHang, Pat Pat, JoeJay, MCC, Yee)去石澳ＢＢＱ，但係下晝就頃盤大雨，咁就改去淺水灣啦，點知下晝勁好天，咁又改返去石澳啦。原本約４：３０係中環等，點知等Bonnie，Annie就等左半個鐘，順便等埋JoeJay放工又等左半個鐘。結果７點先去到筲萁灣買野，而Bonnie同Annie就去霸爐先。
去到石澳都八點幾啦，勁多人，勁大霧同埋勁熱。Bonnie話有一家四口就黎走，於是就好似酒樓等位咁企係隔離，結果O果家人係我地群眾壓力下，都知難而退，真慘～～～
今晚真係好熱，對住個爐仲熱，所以燒燒下大家都走開啦。咁燒左大約２個鐘，劉少話行下，咁我同佢出左去沙灘行。今晚好大浪，好次話有個台風吹緊黎香港，但係都仲有好多人係岸邊玩水，咁黑既環境，就算無風都危險啦。點知原來Mike, LeeHang同Joe三個人已經落左水，仲係到玩沖浪添～～～
大約１點半，大家都係沙灘到ｈｅａ，Vincent就買左個排球玩，係漆黑一片既沙灘玩排球，我都係第一次。結果，當然係開波，追波同執波啦。差唔多玩都２點，大家都話要睇波，今晚係歐冠４強，葡萄牙對荷蘭。咁就拿拿臨去沖身跟住搭亡命小巴飛出旺角。可惜架小巴原途係咁兜客，仲要係咁Report俾行家聽邊到有其小巴掙食，邊到有客等等。差唔多３點先去到旺角，當然間間吧都滿晒啦，聽日放假嘛～～～跟住JoeJay話Neway門口有得睇，唔係呀，企街睇波～～～唉，呢次又係我既第一次。
睇到４點９左右，葡萄牙贏２比１，跟住去搵野食。有個伙計隔住條街叫話佢間茶餐廳有位，雖然都估到係黑店，但係真係好倦啦，唯有入去俾人斬都照殺啦。望到個餐牌，好大隻字寫住”如無惠顧者，需付３０服務費”。黑店！
大約５點半左右，其他人都去搭火車，得番我，LeeHang同Mike去搭巴士。有無搞錯，果個鐘數，竟然無一架車返灣仔，地鐵０６：０９先至有頭班車，１０４就要０５：４５先有頭車，而９０５就要０６：００先有頭車。最慘既就係Ｎ１２２已經係０５：００開左尾車啦，離譜！結果都要搭通霄綠巴４９ｓ先返到屋企。